Bank Holiday: આજે બકરી ઈદ નિમિત્તે બેંકો રહેશે બંધ કે ચાલુ? જાણો દેશના ક્યા રાજ્યોમાં શું છે સ્થિતિ

Bank Holiday For Bakri Eid 2026: જો તમે આજે કોઈ જરૂરી કામ માટે બેંકમાં જવાનું વિચારી રહ્યા છો, તો ઘરેથી નીકળતા પહેલા બેંક હોલિડે (Bank Holiday) લિસ્ટ ચોક્કસ તપાસી લેવું જોઈએ. આજે 28 મે, ગુરુવારના રોજ બકરી ઈદ (ઈદ-ઉલ-અઝહા) તહેવારને કારણે દેશના મોટાભાગના રાજ્યોમાં બેંકો અને નાણાકીય સંસ્થાઓ બંધ રાખવામાં આવી છે, જોકે કેટલાક રાજ્યોમાં બેંકો ખુલ્લી પણ છે.

સરકારી કચેરીઓમાં પણ જાહેર રજા

બકરીદ/ઈદ-ઉલ-અઝહા એક ગેઝેટેડ રજા હોવાથી, તેને સમગ્ર દેશમાં કેન્દ્ર સરકારની કચેરીઓ, બેંકો અને મોટાભાગની રાજ્ય સરકારની કચેરીઓ માટે જાહેર રજા તરીકે મનાવવામાં આવી રહી છે. અગાઉ 27 મે, બુધવારના રોજ રજા જાહેર હતી. પરંતુ હવે દેશભરમાં કેન્દ્ર સરકારની તમામ વહીવટી કચેરીઓ 28 મે, ગુરુવારના રોજ બંધ રહેશે. દિલ્હી/નવી દિલ્હીમાં સ્થિત કેન્દ્ર સરકારની કચેરીઓ પણ આજે બકરીદના અવસર પર બંધ રહેશે.

જાણો કયા શહેરોમાં બેંકો બંધ રહેશે?

આજે બકરીદના પાવન પર્વ નિમિત્તે અમદાવાદ, નવી દિલ્હી, બેંગલુરુ, ભોપાલ, ચંદીગઢ, ચેન્નાઈ, દેહરાદૂન, અગરતલા, આઈઝોલ અને સમગ્ર મહારાષ્ટ્રમાં નાણાકીય સંસ્થાઓમાં રજા રહેશે.

આ ઉપરાંત ઇમ્ફાલ, જયપુર, કાનપુર, કોહિમા, કોલકાતા, લખનૌ, પણજી, પટના, રાયપુર, રાંચી, શિલોંગ, શિમલા અને વિજયવાડા શહેરોમાં પણ બેંકોમાં કામકાજ નહીં થાય. જમ્મુ, શ્રીનગર, કોચી અને તિરુવનંતપુરમ શહેરોમાં બેંકો ગઈકાલે પણ બંધ હતી. અને આજે પણ બંધ જ રહેશે.

આ પણ વાંચો: Bakrid 2026: બકરીદ માટે મદ્રાસ હાઈકોર્ટનો મોટો નિર્ણય, તમિલનાડુમાં ગાયની કુરબાની પર સંપૂર્ણ પ્રતિબંધ

ડિજિટલ બેન્કિંગ સેવાઓ ચાલુ રહેશે

આજે બકરીદના કારણે ભલે મોટાભાગના રાજ્યોમાં બેંક બ્રાન્ચ બંધ હોય, પરંતુ ગ્રાહકોને કોઈ મોટી મુશ્કેલીનોય સામનો કરવો પડશે નહીં. તમામ ગ્રાહકો ઇન્ટરનેટ બેન્કિંગ, મોબાઇલ બેન્કિંગ, UPI, ATM અને કાર્ડ વ્યવહારો જેવી ડિજિટલ બેંકિંગ સેવાનો ઉપયોગ કરી શકે છે. આ તમામ ઓનલાઇન સુવિધા સામાન્ય દિવસોની જેમ જ કામ કરતી રહેશે, જેથી ગ્રાહકો ઘરે બેઠા જ પોતાના નાણાકીય લેવડ-દેવડના કામ સરળતાથી પતાવી શકે છે.