Upcoming IPOs: ભારતીય શેરબજારના પ્રાથમિક માર્કેટ (Primary Market) માં છેલ્લા ત્રણ અઠવાડિયાથી જોવા મળેલી સુસ્તીનો અંત આવ્યો છે. 1 જૂનથી 5 જૂન વચ્ચે પ્રાઈમરી માર્કેટમાં ફરી એકવાર જોરદાર હલચલ જોવા મળશે. આ સપ્તાહે કુલ 5 કંપનીઓ પોતાના આઈપીઓ (IPO) લોન્ચ કરવા જઈ રહી છે, જેના દ્વારા બજારમાંથી ₹900 કરોડથી વધુનું ભંડોળ એકત્ર કરવાનો લક્ષ્ય રાખવામાં આવ્યો છે. આ પાંચ ઇશ્યૂમાંથી બે મોટા મેઈનબોર્ડ આઈપીઓ (CMR ગ્રીન ટેક અને હેક્સાગોન ન્યુટ્રિશન) છે, જે સંયુક્ત રીતે ₹770 કરોડ એકત્ર કરશે.
CMR ગ્રીન ટેક્નોલોજીસ IPO (ખૂલશે: 3 જૂન)
નોન-ફેરસ મેટલ રિસાયક્લિંગ ક્ષેત્રે કાર્યરત કંપની CMR ગ્રીન ટેક્નોલોજીસ આ અઠવાડિયે માર્કેટમાં આવનારો પ્રથમ મેઈનબોર્ડ આઈપીઓ છે. કંપની ઓફર-ફોર-સેલ (OFS) હેઠળ 3.28 કરોડ ઇક્વિટી શેર વેચીને ₹631 કરોડ એકત્ર કરવા માંગે છે. આ ઇશ્યૂ સંપૂર્ણપણે OFS હોવાથી કંપનીને આ ભંડોળમાંથી કોઈ સીધી રકમ મળશે નહીં. કંપનીએ આ શેર માટે ₹182-192 પ્રતિ શેરની પ્રાઇસ બેન્ડ નક્કી કરી છે.
હેક્સાગોન ન્યુટ્રિશન IPO (ખૂલશે: 5 જૂન)
બીજો મેઇનબોર્ડ આઈપીઓ રિસર્ચ-બેઝ્ડ ન્યુટ્રિશન સોલ્યુશન્સ પ્રોવાઇડર કંપની હેક્સાગોન ન્યુટ્રિશનનો છે. આ ઇશ્યૂ 5 જૂનના રોજ સબ્સ્ક્રિપ્શન માટે ખૂલશે, જેનો ઉદ્દેશ્ય અંદાજે ₹139 કરોડ એકત્ર કરવાનો છે. આમાં વર્તમાન પ્રમોટર્સ દ્વારા 3.08 કરોડ શેરની ઓફર-ફોર-સેલ સામેલ છે. કંપનીએ તેની પ્રાઇસ બેન્ડ ₹42-45 પ્રતિ શેર નિર્ધારિત કરી છે.
SME સેગમેન્ટમાં પણ ધૂમ: ₹138 કરોડથી વધુ એકત્ર કરાશે
મેરિટ્રોનિક્સ IPO: ઇલેક્ટ્રોનિક્સ સિસ્ટમ્સ ડિઝાઇન એન્ડ મેન્યુફેક્ચરિંગ (ESDM) ક્ષેત્રની આ કંપનીનો ₹70 કરોડનો આઈપીઓ સબસ્ક્રિપ્શન માટે ખૂલી ચૂક્યો છે. કંપનીએ આ માટે ₹141-149 ની પ્રાઇસ બેન્ડ રાખી છે.
વાહ કેમિકલ્સ IPO: ટેક્સટાઇલ્સ માટે કેમિકલ્સ બનાવતી આ કંપની ફિક્સ્ડ-પ્રાઇસ ઇશ્યૂ દ્વારા ₹13.45 કરોડ એકત્ર કરશે. જેમાં કંપની ₹60 પ્રતિ શેરના ભાવે 22.42 લાખ શેર ઓફર કરશે.
ગેન્ક્સાઇ એનાલિટિક્સ IPO: એન્ટરપ્રાઇઝ પર્ફોર્મન્સ એન્ડ એનાલિટિક્સ સોલ્યુશન્સ પ્રોવાઇડર આ કંપની 47.28 લાખ નવા શેર ઇશ્યૂ કરીને ₹54.8 કરોડ ઊભા કરવાની યોજના ધરાવે છે. આ માટેની પ્રાઇસ બેન્ડ ₹110-116 પ્રતિ શેર રાખવામાં આવી છે.
બે SME આઈપીઓ બંધ થવાની તૈયારીમાં
નવા આઈપીઓ ઉપરાંત, અગાઉથી ખૂલેલા બે SME ઇશ્યૂ આ અઠવાડિયે બંધ થવાના આરે છે.
ઓરેટ ટ્રેડે IPO: ઔદ્યોગિક મટિરિયલ્સ સપ્લાયર કંપનીનો આ ₹27 કરોડનો આઈપીઓ 2 જૂનના રોજ બંધ થશે. અત્યાર સુધી આ ઇશ્યૂને આશરે 15% સબ્સ્ક્રિપ્શન મળ્યું છે.
SMR જ્વેલ્સ IPO: કંપનીએ પોતાના ₹64 કરોડના પબ્લિક ઇશ્યૂની અંતિમ તારીખ લંબાવીને 3 જૂન કરી છે. અત્યાર સુધીમાં આ ઇશ્યૂ 42% સબ્સ્ક્રાઇબ થયો છે.