NCW notice: દેશમાં સ્ટેન્ડ-અપ કોમેડી શોના નામે વાંધાજનક અને અસંવેદનશીલ ટિપ્પણીઓ કરવાનો વિવાદ હવે કાનૂની સકંજામાં ફસાયો છે. હાસ્ય કલાકાર પ્રણીત મોરેના શો દરમિયાન કરવામાં આવેલી વિવાદાસ્પદ ટિપ્પણીઓ મુદ્દે રાષ્ટ્રીય મહિલા આયોગ (NCW) એ કડક વલણ અપનાવ્યું છે. આયોગે કલાકાર પ્રણીત મોરે અને હિમાંશુ જાંગરાને સુનાવણી માટે સત્તાવાર નોટિસ ફટકારી છે
જે અંતર્ગત 22 જૂને સાંજે 4 વાગ્યે તેમને કમિશન સમક્ષ હાજર થવા આદેશ કરાયો છે. બીજી તરફ, આ સમગ્ર મામલે મહારાષ્ટ્ર સાયબર પોલીસ દ્વારા પ્રણીત મોરે, હિમાંશુ જાંગરા અને મેડિકલ સ્ટુડન્ટ ડૉ. સેજલ પવાર સહિત અન્ય સંકળાયેલા લોકો સામે ગુનો (FIR) દાખલ કરવામાં આવ્યો છે.
370 બિરયાની વિવાદ અને NCW ની કાર્યવાહી
ગુરુગ્રામમાં આયોજિત પ્રણીત મોરેના એક સ્ટેન્ડ-અપ શોનો વીડિયો સોશિયલ મીડિયા પર વાયરલ થયો હતો, જેમાં 370 બિરયાની અને મહિલાઓની સંમતિને લઈને અત્યંત વાંધાજનક ટિપ્પણીઓ કરવામાં આવી હતી. આ શોના પ્રેક્ષક તરીકે આવેલા હિમાંશુ જાંગરા નામના વ્યક્તિએ સ્ટેજ પરથી આવી અણછાજતી વાતો કરી હતી.
PTI ના જણાવ્યા અનુસાર, મહિલા આયોગના અધ્યક્ષ વિજયા રાહટકરે આ બાબતની સ્વતઃ સંજ્ઞાન લઈને હરિયાણાના DGP ને પત્ર લખ્યો છે અને ઝડપી તેમજ કડક કાર્યવાહીની માંગ કરી છે. આયોગે સાત દિવસની અંદર આ મામલે લેવાયેલા પગલાંનો વ્યાપક અહેવાલ માંગ્યો છે, જેમાં FIR ની સ્થિતિ, ભારતીય ન્યાય સંહિતા હેઠળની જોગવાઈઓ અને શોના આયોજકોની ભૂમિકાની તપાસનો સમાવેશ થાય છે. ઉલ્લેખનીય છે કે આ વિવાદના કારણે હિમાંશુ જાંગરાએ ગુરુગ્રામની જે એજન્સીમાં તે કામ કરતો હતો ત્યાંથી નોકરી પણ ગુમાવવી પડી છે.
મૃતદેહોની મજાક ઉડાવવા પર AIMSA નો ભારે આક્રોશ
આ વિવાદ હજુ શાંત થયો નહોતો ત્યાં જ પ્રણીત મોરેના શોની બીજી એક જૂની ક્લિપ સોશિયલ મીડિયા પર વાયરલ થઈ હતી. આ વીડિયોમાં મુંબઈની KEM હોસ્પિટલની MBBS ની વિદ્યાર્થિની સેજલ પવારે તબીબી સંશોધન માટે દાનમાં આપવામાં આવેલા Dead Bodies અને તેમના ગુપ્ત ભાગો અંગે અત્યંત શરમજનક ટિપ્પણી કરી હોવાનું સામે આવ્યું હતું.
આ બાબતની ઓલ ઈન્ડિયા મેડિકલ સ્ટુડન્ટ્સ એસોસિએશનએ સખત શબ્દોમાં નિંદા કરી છે. AIMSA એ જણાવ્યું કે, મનોરંજન કે હાસ્ય માટે બોડી ડોનર્સ અને શબનો ઉપયોગ કરવો એ તબીબી શિક્ષણના ગૌરવને ઠેસ પહોંચાડનારું અને અસંવેદનશીલ છે. સંસ્થાએ આ મામલે સંડોવાયેલા લોકો પાસેથી તાત્કાલિક માફીની માંગ કરી છે અને કાનૂની કાર્યવાહીની ચેતવણી આપી છે. જોકે, વિવાદ વધ્યા બાદ સેજલ પવારે જાહેરમાં માફી માંગી લીધી છે.
મહારાષ્ટ્ર સાયબર પોલીસ દ્વારા ગુનો દાખલ
આ સમગ્ર મામલાને ગંભીરતાથી લઈને મહારાષ્ટ્ર સાયબર દ્વારા પ્રણીત મોરે, હિમાંશુ જાંગરા, ડૉ. સેજલ પવાર અને અન્ય લોકો સામે ભારતીય દંડ સંહિતાની વિવિધ કલમો તેમજ IT Act, 2000 ની કલમ 67 હેઠળ ગુનો નોંધવામાં આવ્યો છે. આરોપ છે કે ઓનલાઈન પ્લેટફોર્મ પર શેર કરાયેલા આ વીડિયોમાં મહિલાઓ, સંમતિ અને મૃતકો પ્રત્યે ભારે અપમાનજનક ભાષાનો પ્રયોગ કરવામાં આવ્યો હતો. હાલમાં આ મામલે પોલીસ અને મહિલા આયોગ બંને કડક તપાસ ચલાવી રહ્યા છે.