Vadodara Water Crisis: ઉનાળાના અંતિમ ચરણમાં વડોદરા શહેરના પૂર્વ અને દક્ષિણ વિસ્તારમાં પીવાના પાણીની વિકટ સમસ્યા સર્જાઈ છે. આજવા સરોવરની ઘટતી જતી સપાટીને ધ્યાનમાં રાખીને વડોદરા મ્યુનિસિપલ કોર્પોરેશન (VMC)એ તાત્કાલિક અસરથી નર્મદા કેનાલમાંથી દરરોજ 30 MLD પાણી લેવાનો મહત્વનો નિર્ણય કર્યો છે. પાલિકા કમિશનર અરુણ મહેશ બાબુએ આ અંગે ઉચ્ચ સ્તરીય બેઠક યોજીને અધિકારીઓને કડક સૂચનાઓ આપી છે.
આજવા સરોવરનું જળસ્તર 206 ફૂટ પર, નર્મદાના પાણીનો સહારો
ચાલુ વર્ષે ચોમાસાનું આગમન મોડું થવાની શક્યતા અને ગરમીના પ્રકોપને કારણે આજવા સરોવરનું લેવલ ઘટીને 206 ફૂટ સુધી પહોંચી ગયું છે. આ પરિસ્થિતિને જોતા વહીવટી તંત્ર એલર્ટ મોડ પર આવી ગયું છે. સરદાર સરોવર નર્મદા નિગમ લિમિટેડ (SSNL) સાથે સંકલન સાધીને આગામી એક મહિના સુધી વધારાનું પાણી મેળવવાની વ્યવસ્થા કરવામાં આવી છે, જેથી નાગરિકોને પીવાના પાણીની અછતનો સામનો ન કરવો પડે.
કમિશનરની બેઠકમાં લેવાયેલા મહત્વના નિર્ણયો
પાણીના દબાણ અને દૂષિત પાણીની સમસ્યા: પૂર્વ અને ઉત્તર ઝોનમાં પાણીના ઓછા દબાણ (Low Pressure) અને દૂષિત પાણીની ફરિયાદોને લઈને કમિશનરે ઇજનેરોને કાયમી ઉકેલ લાવવા માટે તાકીદ કરી છે.
પાણી ચોરી સામે લાલ આંખ: પાલિકાના નેટવર્કમાંથી ગેરકાયદે કનેક્શન લેનારા અને ડાયરેક્ટ મોટર મૂકીને પાણી ચોરી કરનારાઓ સામે કાર્યવાહી કરવા માટે ફ્લાઈંગ સ્ક્વોડ તૈનાત કરવામાં આવી છે.
કૃત્રિમ અછત પર નજર: કેટલીક સોસાયટીઓમાં પાણી હોવા છતાં ટેન્કર મંગાવીને કૃત્રિમ અછત ઊભી કરવામાં આવતી હોવાનું ધ્યાને આવ્યું છે, જેની સામે પાલિકા કડક વલણ અપનાવશે.
ચોમાસા પૂર્વેની તૈયારીઓનું અલ્ટીમેટમ
પાણીની સમસ્યાની સાથે સાથે કમિશનરે પ્રી-મોન્સૂન કામગીરીની પણ સમીક્ષા કરી હતી. 15 જૂન સુધીમાં શહેરમાં ચાલી રહેલા તમામ ડ્રેનેજના કામો પૂર્ણ કરવા અને પ્રથમ વરસાદ પહેલા રસ્તા પરના ખાડા પૂરવાની કામગીરી (પેચવર્ક) પૂર્ણ કરવા માટે એજન્સીઓને કડક નિર્દેશ આપવામાં આવ્યા છે.