યોગેશ કાકાના નિધન બાદ કોણ સંભાળશે માંજલપુરની ધૂરા? જાણો સંભવિત દાવેદારોના નામ

Manjalpur MLA Candidates: વડોદરા શહેરના રાજકારણના દિગ્ગજ નેતા અને માંજલપુર બેઠક પરથી સતત 8 ટર્મ સુધી વિજયી થનારા વરિષ્ઠ ધારાસભ્ય યોગેશ પટેલ (યોગેશ કાકા)ના નિધન બાદ હવે આ બેઠક પર કોણ કબજો જમાવશે તે અંગે રાજકીય ગલિયારાઓમાં ભારે ઉત્સુકતા જોવા મળી રહી છે. ભાજપનો ગઢ ગણાતી આ બેઠક પર હવે ઉત્તરાધિકારીની શોધ શરૂ થઈ છે, ત્યારે સંગઠન અને નેતૃત્વ સામે નવા ચહેરાને તક આપવાનો મોટો પડકાર છે.

નવા નેતૃત્વ માટે ભાજપ સામે ધર્મસંકટ

યોગેશ કાકા માત્ર ધારાસભ્ય નહોતા, પરંતુ તેઓ માંજલપુર વિસ્તારમાં એક સંસ્થા સમાન હતા. તેમના ગયા બાદ હવે જે રીતે રાજકીય ચર્ચાઓ તેજ બની છે, તેમાં આગામી દોઢ વર્ષના કાર્યકાળ માટે ભાજપ કોઈ અનુભવી અથવા તો પ્રભાવશાળી નવા ચહેરાને મેદાનમાં ઉતારવા વિચારી રહ્યું છે. સૂત્રોના જણાવ્યા અનુસાર, હાઈકમાન્ડ એવી વ્યક્તિની શોધમાં છે જે કાકા દ્વારા ઉભી કરવામાં આવેલી મજબૂત વોટબેંકને જાળવી શકે.

કયા નામો દાવેદારીની રેસમાં સૌથી આગળ?

સંગઠનના મજબૂત ચહેરા

ભાજપના વર્તમાન શહેર પ્રમુખ ડો. જયપ્રકાશ સોની અને પૂર્વ શહેર પ્રમુખ ડો. વિજય શાહના નામ હાલ સૌથી વધુ ચર્ચાઈ રહ્યા છે. સંગઠન પર પકડ હોવાને કારણે બંને મજબૂત દાવેદાર માનવામાં આવે છે.

કાકાના નજીકના નેતાઓ

પૂર્વ મેયર નિલેશ રાઠોડ અને પૂર્વ કાઉન્સિલર ઘનશ્યામ પટેલ પણ પોતાની દાવેદારી મજબૂત કરી રહ્યા છે. તેઓ યોગેશ કાકાની કાર્યપદ્ધતિથી પરિચિત છે.

અન્ય વિકલ્પો

જો પક્ષ કોઈ નવા પ્રયોગ કે યુવા ચહેરાને તક આપવા માંગતો હોય, તો કોર્પોરેટર હિરેન સુખડિયાનું નામ પણ ચર્ચાઈ રહ્યું છે. આ ઉપરાંત, સામાજિક અને વ્યવસાયિક રીતે સક્રિય મયંક પટેલનું નામ પણ સરપ્રાઈઝ ઉમેદવાર તરીકે સામે આવી શકે છે.

મહિલા કાર્ડ

જો ભાજપ હાઈકમાન્ડ કોઈ ચોંકાવનારો નિર્ણય લે, તો મહિલા મોરચાના શહેર અધ્યક્ષ સ્નેહલ પટેલનું નામ પણ રેસમાં છે.

હાઈકમાન્ડ ફરી કોઈ સરપ્રાઈઝ આપશે?

રાજકીય વિશ્લેષકોનું માનવું છે કે ભાજપ હંમેશા પોતાની વ્યૂહરચના બદલવા માટે જાણીતું છે. ગત ચૂંટણીમાં પણ જ્યારે અનેક નામોની ચર્ચા વચ્ચે અંતિમ ક્ષણે યોગેશ કાકા પર પસંદગી ઉતારવામાં આવી હતી, ત્યારે હવે આ વખતે પણ ભાજપ કોઈ ડાર્ક હોર્સ ઉમેદવારને મેદાનમાં ઉતારીને સૌને ચોંકાવી શકે છે.

ડિસેમ્બર 2027માં યોજાનારી વિધાનસભાની ચૂંટણી સુધી આ બેઠક પર જે પણ ઉમેદવાર આવશે, તેમની સામે પક્ષના સંગઠનને મજબૂત રાખવાની અને વિકાસના કામોને આગળ ધપાવવાની મોટી જવાબદારી રહેશે. હાલમાં, વડોદરા ભાજપ માટે આ નિર્ણય ખૂબ જ મહત્વનો સાબિત થવાનો છે.