Real Uzair Baloch Story: બોલિવૂડ બ્લોકબસ્ટર ફિલ્મ 'ધુરંધર 2' જોયા પછી દર્શકોના મનમાં એક જ પ્રશ્ન ઘૂમરાઈ રહ્યો છે કે શું ખરેખર હમઝા જેવો કોઈ ભારતીય જાસૂસ પાકિસ્તાનમાં હતો? જોકે, ફિલ્મની શરૂઆતમાં જ આપવામાં આવેલ ડિસ્ક્લેમરમાં સ્પષ્ટ કરવામાં આવ્યું છે કે આ ફિલ્મ ફિક્શન છે, પરંતુ તે કેટલીક સાચી ઘટનાઓથી પ્રેરિત છે.
ફિલ્મના પાત્રો સાચા કે કલ્પના?
આ ફિલ્મમાં રણવીર સિંહ ભારતીય જાસૂસનું પાત્ર ભજવે છે, જે પાકિસ્તાનના લ્યારીમાં રહેમાન ડકૈત અને ઉઝૈર બલોચની ગેંગમાં હમઝા તરીકે ઘૂસીને ભારત વિરોધી તત્વોનો ખાત્મો કરે છે. જોકે, ફિલ્મના કેટલાક પાત્રો સાચા લોકો પર આધારિત છે. વધુમાં, તેમના નામ પણ સાચા નામ જેવા જ છે. જેમાંથી એક નામ છે ઉઝૈર બલોચ...
જાસૂસ હમઝાના પાત્ર પાછળનું સત્ય
પાકિસ્તાન અંડરવર્લ્ડ અને ISI પર દાયકાઓનો રિસર્ચ અનુભવ ધરાવતા પૂર્વ પત્રકાર અનિરુદ્ધ મિત્રાએ આ અંગે ચોંકાવનારા ખુલાસા કર્યા છે. તેમના જણાવ્યા મુજબ, હમઝાનું પાત્ર કોઈ એક જ વ્યક્તિ પર આધારિત નથી, પરંતુ તે ઘણા વાસ્તવિક પાત્રોનું મિશ્રિત રૂપ છે. આ જાસૂસોએ પાકિસ્તાનમાં અલગ-અલગ જગ્યાએ માફિયાઓ અને આર્મીની વચ્ચે ઘૂસીને અનેક ઓપરેશન પાર પાડ્યા હતા.
સાંગલીના એ જાસૂસની કથીત કહાની
અનિરુદ્ધ મિત્રાએ દાવો કર્યો છે કે એક ભારતીય જાસૂસ આજે પણ પાકિસ્તાનની જેલમાં બંધ છે. આ વ્યક્તિ મૂળ મહારાષ્ટ્રના સાંગલીનો વતની હતો, અને ભારતીય નેવીમાં ઓફિસર હતો. વર્ષ 2001 માં ભારતીય સંસદ પર થયેલા હુમલા બાદ દેશ માટે કંઈક કરવાના ઝનૂન સાથે તેણે નેવીની નોકરી છોડી દીધી હતી. જોકે, તેને ભારતીય એજન્સીઓ તરફથી પ્રતિસાદ ન મળ્યો.
આ પણ વાંચો: 'ધુરંધર 2' માટે રણવીર સિંહ કેવી રીતે બન્યો બીસ્ટ, ઘાતક ટ્રાન્સફોર્મેશનનો વીડિયો થયો વાયરલ
જે બાદ તે પોતે જ ઈરાન ગયો અને ત્યાં શિપિંગ અને વોટર ટ્રાન્સપોર્ટનો બિઝનેસ શરૂ કર્યો. પોતાના બિઝનેસ સંપર્કો દ્વારા તે ઉઝૈર બલોચની ગેંગમાં ઘૂસવામાં સફળ રહ્યો અને તેનો વિશ્વાસ જીતી લીધો. તેણે ઉઝૈર સાથે એક ડીલ કરી હતી: તે ઈરાનથી હથિયારો પૂરા પાડશે અને બદલામાં ઉઝૈરે તેને પાકિસ્તાનની ગુપ્ત માહિતી આપવી પડશે. રિપોર્ટ્સ મુજબ, ઉઝૈર બલોચે તે જાસૂસને ઘણા રહસ્યો જણાવ્યા હતા.
અત્યારે ક્યાં છે ઉઝૈર બલોચ?
ગેંગસ્ટર ઉઝૈર બલોચની સફરનો અંત ત્યારે આવ્યો, જ્યારે ડિસેમ્બર 2014માં ઇન્ટરપોલે તેને દુબઈ એરપોર્ટ પરથી ઝડપી લીધો. વર્ષ 2020માં તેને જાસૂસી, મર્ડર અને કિડનેપિંગ જેવા અનેક ગુના હેઠળ 12 વર્ષની સખત સજા ફટકારવામાં આવી હતી. માર્ચ 2026 ની સ્થિતિ મુજબ, ઉઝૈર બલોચ હાલમાં કરાચી સેન્ટ્રલ જેલમાં પોતાની સજા કાપી રહ્યો છે.