Weather Tomorrow, 18 June 2026 | આવતીકાલનું હવામાન: સમગ્ર દેશમાં હાલમાં હવામાનના આશ્ચર્યજનક અને વિવિધ રંગો જોવા મળી રહ્યા છે. એક તરફ ઉત્તર અને મધ્ય ભારત ભીષણ ગરમી અને કાળઝાળ લૂ (Heat Wave)ની લપેટમાં છે, તો બીજી તરફ દક્ષિણ-પશ્ચિમ ચોમાસું (South-West Monsoon) ધીમી પણ મક્કમ ગતિએ આગળ વધી રહ્યું છે. ભારતીય હવામાન વિજ્ઞાન વિભાગ (IMD)ના વરિષ્ઠ વૈજ્ઞાનિક ડૉ. નરેશ કુમારના જણાવ્યા અનુસાર, દેશના અલગ-અલગ ભાગોમાં આગામી દિવસોમાં હવામાનમાં મોટા ફેરફારો થવાના સંકેત છે. દિલ્હી-NCRમાં હાલ વેસ્ટર્ન ડિસ્ટર્બન્સ સક્રિય હોવાથી લોકોને ચોમાસા માટે હજુ રાહ જોવી પડશે, જ્યારે દક્ષિણ અને પૂર્વોત્તર ભારતમાં ભારે વરસાદનું એલર્ટ આપવામાં આવ્યું છે.
ચોમાસા અંગે મોટું અપડેટ: ક્યાં સુધી પહોંચ્યો મોન્સૂનનો રથ?
હવામાન વિભાગના તાજા બુલેટિન મુજબ, દક્ષિણ-પશ્ચિમ ચોમાસું આગળ વધી રહ્યું છે. હાલમાં ચોમાસાની ઉત્તરીય રેખા હરનાઈ, સોલાપુર, હૈદરાબાદ, રાંચી અને મુઝફ્ફરપુર પરથી પસાર થઈ રહ્યું છે. આગામી 4 થી 5 દિવસમાં ચોમાસું તેલંગાણા, ઓડિશા, ઝારખંડ, બિહાર અને છત્તીસગઢના વધુ કેટલાક ભાગોમાં પ્રવેશે તેવી સાનુકૂળ પરિસ્થિતિઓ સર્જાઈ રહી છે.
દેશના 11 પ્રમુખ રાજ્યોમાં આગામી 24 કલાક કેવું રહેશે હવામાન?
દિલ્હી-NCR: ધૂળની ડમરીઓ અને યલો એલર્ટ
રાજધાની દિલ્હી અને આસપાસના વિસ્તારોમાં સક્રિય વેસ્ટર્ન ડિસ્ટર્બન્સના કારણે આગામી એક સપ્તાહ સુધી ધૂળભરી આંધી અને ગાજવીજ સાથે વાવાઝોડાની પ્રવૃત્તિઓ ચાલુ રહેશે. આગામી 24 કલાકમાં દિલ્હી, હરિયાણા અને પંજાબમાં 40 થી 50 કિમી પ્રતિ કલાકની ઝડપે પવન ફૂંકાઈ શકે છે અને હળવા પવન સાથે બૂંદાબાંદી થવાની સંભાવના છે, જેને પગલે હવામાન વિભાગે યલો એલર્ટ જાહેર કર્યું છે.
ઉત્તર પ્રદેશ: કાળઝાળ ગરમી વચ્ચે આંશિક રાહ
યુપીમાં હવામાનના બે અલગ-અલગ પાસા જોવા મળશે. પશ્ચિમ અને પૂર્વી ઉત્તર પ્રદેશના મોટાભાગના વિસ્તારોમાં તીવ્ર સૂર્યપ્રકાશ સાથે ભીષણ લૂ (Severe Heat Wave)ની સ્થિતિ યથાવત રહેશે. જો કે, વેસ્ટર્ન ડિસ્ટર્બન્સની અસરને કારણે પશ્ચિમ યુપીના કેટલાક સીમિત વિસ્તારોમાં સાંજના સમયે ધૂળભરી આંધી કે ગાજવીજ સાથે હળવો વરસાદ પડી શકે છે.
બિહાર: તોફાની પવન સાથે ભારે વરસાદનું એલર્ટ
બિહારમાં ચોમાસાની પ્રગતિ માટે વાતાવરણ એકદમ સાનુકૂળ છે. આગામી 24 કલાકમાં રાજ્યના અનેક જિલ્લાઓમાં વીજળીના કડાકા-ભડાકા સાથે ભારે વરસાદની આશંકા છે. હવામાન વિભાગે બિહાર માટે 50 થી 60 કિમી પ્રતિ કલાકની ઝડપે ફૂંકાનારા તોફાની પવન (Thundersquall)નું એલર્ટ આપ્યું છે. જો કે, વરસાદ પહેલા કેટલાક વિસ્તારોમાં અસહ્ય ઉકળાટ અને આંશિક લૂ નો અનુભવ થશે.
રાજસ્થાન: 80 કિમીની ઝડપે ફૂંકાશે વિનાશક વાવાઝોડું
રાજસ્થાનમાં ગરમીનો પ્રકોપ યથાવત છે, પરંતુ આગામી 24 કલાક રાજ્ય માટે ભારે સાબિત થઈ શકે છે. પશ્ચિમ રાજસ્થાનમાં હવામાન અત્યંત આક્રમક બનશે, જ્યાં 60 થી 70 કિમી પ્રતિ કલાકની ઝડપે ધૂળભરી આંધી આવી શકે છે, જેની મહત્તમ ગતિ 80 કિમી પ્રતિ કલાક સુધી પહોંચવાની આશંકા છે. પૂર્વી રાજસ્થાનમાં પણ વાવાઝોડાની ચેતવણી આપવામાં આવી છે.
મધ્ય પ્રદેશ: અસહ્ય ઉકળાટ અને લૂ નો પ્રકોપ
મધ્ય પ્રદેશના નાગરિકોને હાલ ગરમીમાંથી કોઈ મોટી રાહત મળે તેમ નથી. પૂર્વી અને પશ્ચિમી મધ્ય પ્રદેશના જુદા જુદા ભાગોમાં હીટ વેવ ચાલુ રહેશે. જો કે, બપોર પછી કેટલાક વિસ્તારોમાં 40-50 કિમીની ઝડપે પવન ફૂંકાવા સાથે હળવી છાંટાબાજી થઈ શકે છે, જેનાથી હવામાં ભેજ વધતાં અસહ્ય ઉકળાટ વધશે.
મહારાષ્ટ્ર: દરિયાકાંઠાના વિસ્તારોમાં પ્રી-મોન્સૂન વરસાદ
મહારાષ્ટ્રમાં પ્રાદેશિક વિવિધતા જોવા મળશે. વિદર્ભમાં લૂ નો પ્રકોપ ચાલુ રહેશે, જ્યારે મધ્ય મહારાષ્ટ્ર અને મરાઠવાડામાં હવામાન ગરમ અને ભેજવાળું રહેશે. બીજી તરફ, કોંકણ, ગોવા અને મરાઠવાડાના તટીય વિસ્તારોમાં 40-50 કિમીની ઝડપે પવન ફૂંકાશે અને ગાજવીજ સાથે હળવોથી મધ્યમ પ્રી-મોન્સૂન વરસાદ થવાની સંભાવના છે.
ગુજરાતમાં રવિવારથી મેઘાવી માહોલ જામી શકે
હવામાન વિભાગના નેશનલ સેન્ટર ફોર મીડિયમ રેન્જ વેધર ફોરકાસ્ટિંગ અનુસાર, રવિવારથી એટલે કે 21 જૂનથી રાજ્યમાં મેઘાવી માહોલ જોવા મળી શકે છે. અરબી સમુદ્રમાં સક્રિય થયેલી મજબૂત સિસ્ટમના કારણે રાજ્યના હવામાનમાં 18 જૂનથી પલટો જોવા મળી શકે છે. જેના પગલે દરિયાઇ વિસ્તારોમાં હળવા વરસાદી ઝાપટાં વરસી શકે છે. 21 જૂનથી રાજ્યના ઉત્તર અને મધ્ય ભાગમાં પણ વરસાદી માહોલ છવાઇ શકે છે. 23થી 25 જૂન દરમિયાન સૌરાષ્ટ્ર, દક્ષિણ ગુજરાતના દરિયાકાંઠા ઉપરાંત રાજ્યના અન્ય ભાગોમાં છૂટાછવાયા સ્થળોએ હળવોથી મધ્યમ વરસાદ થવાની શક્યતા જોવા મળી રહી છે.
ઓડિશા: ભારે ઉકળાટ અને વીજળીના કડાકા
ઓડિશાના દરિયાકાંઠાના વિસ્તારોમાં 'હોટ એન્ડ હ્યુમિડ' એટલે કે ગરમ અને અત્યંત ભેજવાળું વાતાવરણ રહેશે, જેના કારણે લોકો ભારે બેચેની અનુભવશે. આ સાથે જ હવામાન વિભાગે 50-60 કિમી પ્રતિ કલાકની ઝડપે પવન ફૂંકાવાની અને આકાશી વીજળી પડવાની ચેતવણી જાહેર કરી છે. ચોમાસું આગળ વધવાની સાથે અહીં વરસાદી પ્રવૃત્તિઓ જોર પકડશે.
ઝારખંડ: વાવાઝોડા અને વરસાદનું એલર્ટ
ઝારખંડમાં ચોમાસાની સક્રિયતા વધી રહી છે. આગામી 24 કલાકમાં રાજ્યના અનેક જિલ્લાઓમાં હવામાન પલટાશે. હવામાન વિભાગના જણાવ્યા અનુસાર, ઝારખંડમાં 50-60 કિમી પ્રતિ કલાકની ઝડપે આંધડ-વાવાઝોડું (Thundersquall) આવવાની અને વીજળી પડવાની સંભાવનાને પગલે એલર્ટ આપવામાં આવ્યું છે. કેટલાક વિસ્તારોમાં મધ્યમ વરસાદથી તાપમાનનો પારો ગગડશે.
આસામ અને મેઘાલય: રેડ એલર્ટ જેવી સ્થિતિ
પૂર્વોત્તર ભારતમાં મોન્સૂન આક્રમક મૂડમાં છે. આસામ અને મેઘાલયમાં આગામી 24 કલાક આકાશ કાળાડિબાંગ વાદળોથી ઘેરાયેલું રહેશે અને મોટાભાગના વિસ્તારોમાં મુશળધારથી અત્યંત ભારે વરસાદ (Heavy to Very Heavy Rainfall) થવાની આશંકા છે. સતત ગાજવીજ અને આકાશી વીજળી પડવાની સંભાવનાને કારણે લોકોને સાવચેત રહેવા અપીલ કરાઈ છે.
કેરળ: મેઘરાજાની ધબધબાટી ચાલુ
દક્ષિણ ભારતના કેરળમાં ચોમાસું પૂરી ક્ષમતા સાથે વરસી રહ્યું છે. કેરળ અને માહેમાં આગામી 24 કલાકમાં વ્યાપક સ્તરે ભારે વરસાદ થવાની ચેતવણી જારી કરવામાં આવી છે. દરિયાકાંઠાના વિસ્તારોમાં 30 થી 40 કિમી પ્રતિ કલાકની ઝડપે તેજ પવન ફૂંકાશે, જેના કારણે માછીમારોને પણ સાવધ રહેવા સૂચના અપાઈ છે.