IND vs NZ T20 And ODI Series 2026 Schedule and Live Streaming Details: દક્ષિણ આફ્રિકા સામેની 5 મેચની T20 શ્રેણીમાં 3-1થી શાનદાર વિજય મેળવ્યા બાદ, ભારતીય ક્રિકેટ ટીમ હવે આગામી પડકારો માટે સજ્જ છે. વર્ષ 2026 ની શરૂઆતમાં જ ભારતીય ટીમ પોતાના હોમ ગ્રાઉન્ડ પર ન્યુઝીલેન્ડ સામે ટકરાશે. T20 World Cup 2026 પહેલા ભારત માટે આ આખરી અને સૌથી મહત્વની આંતરરાષ્ટ્રીય શ્રેણી બની રહેશે.
વર્લ્ડ કપની પૂર્વતૈયારીનો સુવર્ણ અવસર
આગામી ટી20 વર્લ્ડ કપ 2026ની શરૂઆત 7 ફેબ્રુઆરીથી થવા જઈ રહી છે. તે પહેલાં ટીમ ઈન્ડિયા પોતાની તૈયારીઓને આખરી ઓપ આપવા માટે ન્યુઝીલેન્ડ સામે મેદાનમાં ઉતરશે. ન્યુઝીલેન્ડના ભારત પ્રવાસની શરૂઆત 3 મેચની ODI શ્રેણીથી થશે, ત્યારબાદ બંને ટીમો વચ્ચે 5 મેચની રોમાંચક T20 શ્રેણી રમાશે. T20 શ્રેણીની ફાઈનલ મેચ 31 જાન્યુઆરીના રોજ રમાશે, જે વર્લ્ડ કપના એક સપ્તાહ પહેલા જ પૂર્ણ થશે.
ગુજરાતના ક્રિકેટ રસિયાઓ માટે સારા સમાચાર
ક્રિકેટ ચાહકો માટે ખુશીના સમાચાર એ છે કે આ શ્રેણીની શરૂઆતી બે ODI મેચો ગુજરાતમાં રમાશે. શ્રેણીની પ્રથમ મેચ વડોદરા અને બીજી મેચ રાજકોટમાં યોજાશે.
IND vs NZ 2026 Schedule: વનડે સિરીઝનું સંપૂર્ણ શેડ્યૂલ
| તારીખ | મેચ | સ્થળ | સમય |
|---|---|---|---|
| 11 જાન્યુઆરી | પ્રથમ ODI | વડોદરા | બપોરે 1:30 વાગ્યે |
| 14 જાન્યુઆરી | બીજી ODI | રાજકોટ | બપોરે 1:30 વાગ્યે |
| 18 જાન્યુઆરી | ત્રીજી ODI | ઈન્દોર | બપોરે 1:30 વાગ્યે |
IND vs NZ 2026 Schedule: T20 સિરીઝનું સંપૂર્ણ શેડ્યૂલ
| તારીખ | મેચ | સ્થળ | સમય |
|---|---|---|---|
| 21 જાન્યુઆરી | પ્રથમ T20 | નાગપુર | સાંજે 7:00 વાગ્યે |
| 23 જાન્યુઆરી | બીજી T20 | રાયપુર | સાંજે 7:00 વાગ્યે |
| 25 જાન્યુઆરી | ત્રીજી T20 | ગુવાહાટી | સાંજે 7:00 વાગ્યે |
| 28 જાન્યુઆરી | ચોથી T20 | વિશાખાપટ્ટનમ | સાંજે 7:00 વાગ્યે |
| 31 જાન્યુઆરી | પાંચમી T20 | તિરુવનંતપુરમ | સાંજે 7:00 વાગ્યે |
IND vs NZ 2026: હેડ-ટુ-હેડ રેકોર્ડ: કોનું પલ્લું ભારે?
ODI: બંને ટીમો વચ્ચે અત્યાર સુધીમાં 120 વનડે મેચ રમાઈ છે. જેમાં ભારતે 62 અને ન્યુઝીલેન્ડે 50 મેચ જીતી છે. 7 મેચનું કોઈ પરિણામ આવ્યું નથી અને 1 મેચ ટાઈ રહી હતી.
T20: T20 ફોર્મેટમાં કુલ 25 મેચો રમાઈ છે, જેમાં ભારતે 14 અને કીવી ટીમે 10 મેચમાં જીત મેળવી છે, જ્યારે 1 મેચ ટાઈ રહી છે.
T20 શ્રેણી માટે ટીમ ઈન્ડિયાની જાહેરાત
ODI શ્રેણી માટે બંને ટીમોની જાહેરાત બાકી છે, પરંતુ 5 મેચની T20 શ્રેણી માટે ભારતીય ટીમની જાહેરાત કરી દેવામાં આવી છે. સૂર્યકુમાર યાદવ ટીમને લીડ કરશે.
ભારતીય T20 ટીમ: સૂર્યકુમાર યાદવ (કેપ્ટન), અક્ષર પટેલ (વાઈસ કેપ્ટન), સંજુ સેમસન, અભિષેક શર્મા, તિલક વર્મા, હાર્દિક પંડ્યા, ઈશાન કિશન, શિવમ દુબે, વોશિંગ્ટન સુંદર, હર્ષિત રાણા, જસપ્રીત બુમરાહ, વરુણ ચક્રવર્તી, કુલદીપ યાદવ, અર્શદીપ સિંહ, રિંકુ સિંહ.