Sonu Nigam health update: બોલિવૂડ મ્યુઝિક ઇન્ડસ્ટ્રીમાં અનેક સુપરહિટ ગીતો આપીને કરોડો દિલો પર રાજ કરનારા દિગ્ગજ ગાયક સોનુ નિગમના ચાહકો માટે ચિંતાજનક સમાચાર સામે આવ્યા છે. સિંગર સોનુ નિગમ તાજેતરમાં નર્વસ સંબંધિત એક ગંભીર અને અત્યંત પીડાદાયક બીમારીનો સામનો કરી રહ્યા હોવાનો ખુલાસો થયો છે. જોકે, આટલી ગંભીર શારીરિક તકલીફ અને અસહ્ય પીડા હોવા છતાં, સંગીત પ્રત્યેની તેમની પ્રતિબદ્ધતા જરાય ઓછી થઈ નથી. છેલ્લા એક અઠવાડિયાથી તબીબી સારવાર હેઠળ હોવા છતાં, તેમણે મુંબઈમાં પોતાના ચાહકો માટે યોજાનારા લાઈવ કોન્સર્ટમાં પર્ફોર્મ કરવાનું નક્કી કર્યું છે, જે દર્શાવે છે કે તેઓ પોતાના કામ અને ચાહકો પ્રત્યે કેટલા સમર્પિત છે.
સોનુ નિગમે વીડિયો શેર કરી આપી હેલ્થ અપડેટ
આ પણ વાંચો
સોનુ નિગમે તાજેતરમાં જ પોતાના સત્તાવાર ઇન્સ્ટાગ્રામ એકાઉન્ટ પર એક વિડિઓ પોસ્ટ કરીને પોતાના સ્વાસ્થ્ય અંગે ચાહકોને માહિતગાર કર્યા હતા. તેમણે ખુલાસો કર્યો કે તેઓ 'નર્વસ કમ્પ્રેશન' (ચેતા સંકોચન) ની સમસ્યા સામે ઝઝૂમી રહ્યા છે, જેના કારણે તેમને ભારે અગવડતા અને પીડા થઈ રહી છે. વિડિઓમાં પોતાની સ્થિતિ વર્ણવતા 52 વર્ષીય ગાયકે કહ્યું, "મારી ચેતા પર સતત દબાણ આવી રહ્યું છે. આ સમસ્યાનું મૂળ કારણ જાણવા માટે હું છેલ્લા એક અઠવાડિયાથી સતત MRI અને CT સ્કેન જેવા વિવિધ તબીબી પરીક્ષણો કરાવી રહ્યો છું અને ભારે દવાઓ પણ લઈ રહ્યો છું."
ફિઝીયોથેરાપી અત્યંત પડકારજનક, અવાજ પર થઈ અસર
પોતાની સારવાર વિશે વાત કરતા સોનુ નિગમે જણાવ્યું કે, આ સ્થિતિમાંથી બહાર આવવા માટે તેઓ નિયમિત ફિઝીયોથેરાપી કરાવી રહ્યા છે, જે ખૂબ જ પીડાદાયક અને પડકારજનક સાબિત થઈ રહી છે. અસહ્ય દુખાવાના કારણે તેઓ હાલમાં પેઇનકિલર્સ (દુખાવાની દવાઓ) લઈ રહ્યા છે, જેની સીધી અસર તેમના અવાજ પર પણ પડી છે અને તેમનો અવાજ થોડો ભારે થઈ ગયો છે. જોકે, આટલી પ્રતિકૂળ પરિસ્થિતિમાં પણ તેમણે ચાહકોને ખાતરી આપી છે કે તેઓ પોતાનો આગામી કોન્સર્ટ કોઈ પણ સંજોગોમાં રદ કરવાના નથી. એક લાંબા વિરામ બાદ મંચ પર પરત ફરવા માટે તેઓ ખૂબ ઉત્સાહિત છે અને ચાહકોને આપેલી પ્રતિબદ્ધતા તોડવા માંગતા નથી.
ચાહકોએ કરી જલ્દી સ્વસ્થ થવાની પ્રાર્થના
પોતાના ફેવરિટ સિંગરને આ સ્થિતિમાં જોઈને સોશિયલ મીડિયા પર તેમના ચાહકો ભારે ચિંતા વ્યક્ત કરી રહ્યા છે અને તેમના ઝડપી સાજા થવા માટે પ્રાર્થના કરી રહ્યા છે. સોનુ નિગમની પોસ્ટ પર કમેન્ટ કરતાં એક યુઝરે લખ્યું, "જલ્દી સ્વસ્થ થાઓ, સોનુ સર… તમારો મધુર અવાજ અમને સાજો કરે છે. કૃપા કરીને થોડો આરામ કરો અને પોતાની સંભાળ રાખો." જ્યારે અન્ય એક સંગીતપ્રેમીએ લખ્યું, "દુનિયાભરના તમામ સંગીત પ્રેમીઓની પ્રાર્થનાઓ તમારી સાથે છે, ઈશ્વર તમને જલ્દી સ્વસ્થ કરે." આ મુશ્કેલ સમયમાં પણ સોનુ નિગમનો આ જઝ્બો ખરેખર પ્રશંસનીય છે.