PM Modi Donald Trump Meeting: ફ્રાન્સમાં યોજાઈ રહેલા પ્રતિષ્ઠિત જી-7 શિખર સંમેલન (G7 Summit 2026) દરમિયાન વૈશ્વિક રાજનીતિના બે સૌથી શક્તિશાળી નેતાઓ, ભારતના વડાપ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે લાંબા સમય બાદ મુલાકાત થઈ છે. આશરે 16 મહિનાના લાંબા અંતરાલ પછી બંને નેતાઓ જ્યારે એકબીજાને મળ્યા ત્યારે તેમની વચ્ચે ભારે ગરમજોશી જોવા મળી હતી. આ સમિટ દરમિયાન પીએમ મોદી માત્ર અમેરિકા જ નહીં, પરંતુ કેનેડા, યુકે (બ્રિટન) અને યુએઈ (UAE)ના ટોચના નેતાઓ સાથે પણ મહત્વપૂર્ણ દ્વિપક્ષીય બેઠકો યોજીને વૈશ્વિક મુદ્દાઓ પર ચર્ચા કરવાના છે.
ભારતીય નાવિકોના મોતનો મુદ્દો ગરમાયો: શું પીએમ મોદી ઉઠાવશે સવાલ?
આ હાઈ-પ્રોફાઈલ મુલાકાત એવા સમયે થઈ રહી છે જ્યારે ભારત અને અમેરિકા વચ્ચે એક ગંભીર રાજદ્વારી તણાવ ચાલી રહ્યો છે. ઓમાનના દરિયાકાંઠા (સ્ટ્રેટ ઓફ હોર્મુઝ) નજીક અમેરિકી નૌસેના (US Navy) દ્વારા કરવામાં આવેલા એક કથિત હુમલામાં ત્રણ ભારતીય નાવિકોના મોત થયા હતા, જેને લઈને ભારતમાં ભારે આક્રોશ જોવા મળી રહ્યો છે.
આ ગંભીર ઘટના પર ખેદ વ્યક્ત કરવા કે માફી માંગવાના બદલે અમેરિકી વિદેશ મંત્રી માર્કો રુબિઓએ આકરું વલણ અપનાવતા કહ્યું હતું કે, વિસ્તારમાં શાંતિ અને સુરક્ષા જાળવવા માટે તૈનાત અમેરિકી સેનાના આદેશોનું તમામ કોમર્શિયલ જહાજોએ તાત્કાલિક પાલન કરવું જોઈએ. અમેરિકાના આ વલણ સામે ભારતમાં સતત તીખા સવાલો ઉઠી રહ્યા છે. હવે સૌની નજર એ વાત પર ટકેલી છે કે શું પીએમ મોદી જી-7ના મંચ પર આ સંવેદનશીલ મુદ્દો ટ્રમ્પ સમક્ષ ઉઠાવશે કે કેમ.
#WATCH | Prime Minister Narendra Modi and US President Donald Trump seen interacting at the G7 Summit in Evian, France.
— ANI (@ANI) June 16, 2026
(Video: DD News) pic.twitter.com/HIiZPZOyxR
17 જૂને યોજાશે દ્વિપક્ષીય બેઠક અને વ્યાપાર કરારની સમીક્ષા
વ્હાઇટ હાઉસ દ્વારા જારી કરવામાં આવેલા સત્તાવાર નિવેદન અનુસાર, રાષ્ટ્રપતિ ડોનાલ્ડ ટ્રમ્પ ફ્રાન્સમાં જી-7 સમિટ દરમિયાન પીએમ મોદી સહિત વિશ્વના અન્ય નેતાઓ સાથે બેઠક કરશે. એક વરિષ્ઠ અમેરિકી અધિકારીના જણાવ્યા મુજબ, 17 જૂને પીએમ મોદી અને રાષ્ટ્રપતિ ટ્રમ્પ વચ્ચે એક વિશેષ દ્વિપક્ષીય બેઠકનું આયોજન કરવામાં આવ્યું છે.
આ બેઠકમાં ભારત અને અમેરિકા વચ્ચે પ્રસ્તાવિત વ્યાપાર કરાર (Trade Agreement) ની દિશામાં થયેલી પ્રગતિની વિગતવાર સમીક્ષા કરવામાં આવશે. આ મહત્વની ચર્ચા બાદ બંને નેતાઓ જી-7 ના અન્ય સભ્ય દેશો, સહયોગી ભાગીદારો અને ટેકનિકલ અધિકારીઓ સાથે એક વર્કિંગ લંચમાં પણ સામેલ થવાના છે.
ટ્રમ્પથી કેમ નારાજ છે યુરોપિયન દેશો?
મિડિલ ઇસ્ટ (મધ્ય પૂર્વ)માં છેલ્લા કેટલાક સમયથી ચાલી રહેલા તણાવ વચ્ચે અમેરિકી રાષ્ટ્રપતિએ પોતાના સહયોગી દેશો પર કરેલી આકરી ટિપ્પણીઓને કારણે યુરોપના નેતાઓમાં ભારે અસંતોષ વ્યાપેલો છે. ઉલ્લેખનીય છે કે, આ વર્ષે ફેબ્રુઆરી મહિનામાં ભારે તણાવ બાદ અમેરિકા અને ઈરાન વચ્ચે એક શાંતિ સમજૂતી સધાઈ હતી.
જો કે, ઈરાન સામેના અમેરિકા-ઈઝરાયેલ સંઘર્ષમાં અમેરિકાના યુરોપિયન સહયોગી દેશો જોડાવા ઈચ્છતા ન હતા, જેના કારણે ટ્રમ્પ તેમનાથી નારાજ થયા હતા. છેલ્લા કેટલાક મહિનાઓમાં ટ્રમ્પના કડક વલણને લીધે જૂના મતભેદો ફરી સપાટી પર આવ્યા છે, જેના કારણે અગાઉ જે વૈશ્વિક નેતાઓ સાથે તેમના આદરભર્યા સંબંધો હતા તેમની સાથે વૈચારિક ટકરાવની સ્થિતિ ઊભી થઈ છે. હકીકતમાં, ટ્રમ્પના પહેલા કાર્યકાળના સમયથી જ જી-7 દેશો સાથે અમેરિકાના સંબંધો તણાવપૂર્ણ રહ્યા છે.
ટ્રમ્પ અને ઇમેન્યુઅલ મેક્રોન વચ્ચે બદલાયા સમીકરણો
આ વર્ષની જી-7 સમિટની યજમાની ફ્રાન્સ કરી રહ્યું છે. ફ્રાન્સના રાષ્ટ્રપતિ ઇમેન્યુઅલ મેક્રોન અને ડોનાલ્ડ ટ્રમ્પ વચ્ચે લાંબા સમયથી સંબંધો રહ્યા છે, પરંતુ તાજેતરના સમયમાં આ સમીકરણોમાં મોટો ખટરાગ જોવા મળ્યો છે. ટ્રમ્પે તાજેતરમાં મેક્રોન પર અને વ્યક્તિગત સ્તરે તેમની વૈવાહિક જીંદગી અંગે કેટલીક ટિપ્પણીઓ કરી હતી, જેના કારણે ફ્રેન્ચ રાષ્ટ્રપતિ પોતાના અમેરિકી સમકક્ષથી ભારે નારાજ દેખાઈ રહ્યા છે. આવા તણાવપૂર્ણ વૈશ્વિક માહોલ વચ્ચે ફ્રાન્સની ધરતી પર યોજાનારી આ સમિટમાં ટ્રમ્પ પ્રત્યે અન્ય દેશોનું વલણ કેવું રહે છે, તેના પર સમગ્ર વિશ્વની નજર ટકેલી છે.